Inyemezamihigo zamurikiwe ibyagezweho muri manda y’imyaka itanu (2021-2026) y’Inama Njyanama

Kuri uyu wa 12 Nzeri 2026, Akarere ka Gicumbi kamuritse ibyagezweho mu gihe cy’imyaka itanu y’Inama Njyanama y’Akarere, mu gikorwa cyabereye mu cyumba mberabyombi cy’Akarere, cyitabiriwe n’abayobozi batandukanye arimo Madamu INGABIRE Paula, Minisitiri w’Ikoranabuhanga na Inovasiyo akaba n’Imboni y’Akarere ka Gicumbi, na Bwana MUGABOWAGAHUNDE Maurice, Guverineri w’Intara y’Amajyaruguru, Intumwa za rubanda, abafatanyabikorwa n’abandi batumirwa mu byiciro bitandukanye.

Mu ijambo ry’ikaze, Umuyobozi w’Akarere ka Gicumbi yagaragaje ko ibyagezweho mu myaka itanu ishize byaturutse ku bufatanye bw’inzego z’ubuyobozi, abaturage n’abafatanyabikorwa batandukanye.

Yashimangiye ko uruhare rw’umuturage mu igenamigambi no mu ifatwa ry’ibyemezo ari imwe mu nkingi z’ingenzi zatumye ibikorwa by’iterambere bishyirwa mu bikorwa, ashimira abafatanyabikorwa bagize uruhare muri urwo rugendo.

Umuyobozi w’Akarere yasabye abafatanyabikorwa gukomeza ubwo bufatanye no kutadohoka ku nshingano, ashimangira ko hakwiye gukomeza kubaho imyumvire imwe ku ntego y’ibikorwa by’ubuyobozi, ari yo gukorera umuturage. “Uwo twese dukorera ni umwe: Umuturage.”

Guverineri w’Intara y’Amajyaruguru, MUGABOWAGAHUNDE Maurice, yashimangiye ko guhuza imbaraga hagati y’ubuyobozi, abaturage n’abagize Inama Njyanama ari ingenzi mu kugera ku iterambere rirambye.

Yagize ati: “Abishyize hamwe nta kibananira. Iyo ubuyobozi bukora neza, n’abaturage na bo bagakorana neza n’abayobozi, Abajyanama bagakorana neza hagati yabo, igenamigambi rigashingira ku bibazo n’ibyifuzo by’abaturage, umutungo w’Akarere ugakoreshwa neza ntakabuza iterambere rigerwaho ndetse n’abaturage bakabyungukiramo.”

Minisitiri w’Ikoranabuhanga na Inovasiyo akaba n’Imboni y’Akarere ka Gicumbi, INGABIRE Paula, wari umushyitsi mukuru, yasabye abayobozi gushyira imbere impinduka zigaragara ku mibereho y’abaturage mu gihe hategurwa kandi hagashyirwa mu bikorwa ingengo y’imari.

Yavuze ko izamuka ry’ingengo y’imari rikwiye kujyana n’impinduka zifatika mu mibereho y’abaturage, cyane cyane mu kugabanya ubukene no kuzamura imibereho yabo agira at: “Tujye twibaza uti: ese ko ingengo y’imari yiyongereye, abaturage bavuye mu bukene ni bangahe, ubuzima bwabo buhagaze bute?”

Minisitiri INGABIRE kandi yibukije abayobozi ko kurangira kwa manda y’imyaka itanu bitavuga ko inshingano zo guteza imbere abaturage zirangiye, ahubwo ko urugendo rw’iterambere rugomba gukomeza.

Ati, manda ishobora kurangira, ariko inshingano zo gukomeza guteza imbere imibereho y’abaturage zigomba gukomeza, asaba abayobozi n’abafatanyabikorwa gukomeza gushyira imbere ibikorwa bifite uruhare mu guhindura ubuzima bw’abaturage.

Imurikabikorwa ryabaye umwanya wo kugaragaza ibyagezweho mu gihe cy’imyaka itanu ishize, gusuzuma uruhare rw’Inama Njyanama mu igenamigambi no mu gukurikirana ishyirwa mu bikorwa ry’ibikorwa by’Akarere, ndetse no kureba ibikwiye gukomeza kwitabwaho mu gihe kiri imbere.