Ubuyobozi n’abafatanyabikorwa barasba imiryango gushyira imirire y’abana ku isonga

Ubuyobozi bw’Akarere ka Gicumbi n’abafatanyabikorwa mu mibereho myiza y’abaturage bakomeje gushishikariza imiryango gushyira imbere imirire myiza y’abana, isuku n’isukura, mu rwego rwo gukumira imirire mibi no guteza imbere imikurire myiza y’abana.

Umuyobozi w’Akarere wungirije ushinzwe Imibereho Myiza y’Abaturage, Bwana Mbonyintwari JMV, ubwo yifatanyaga n' Urunana Development Community (Urunana DC), Ikigo cy'Igihugu gishinzwe kurengera Umwana (NCDA), World Vision Rwanda n’abandi bafatanyabikorwa muri gahunda yo kwegera abaturage no kubagezaho ubutumwa bugamije kurengera ubuzima bw’abana.

Muri iki gikorwa, ababyeyi n’abaturage muri rusange bibukijwe ko gukumira imirire mibi bitangirira mu rugo, binyuze mu kwita ku byo umwana arya, uko ategurirwa ibiribwa, isuku y’umwana n’iy’aho atuye, ndetse no gukurikirana imikurire ye.

Ubutumwa bwatanzwe bwibanze ku kamaro ko konsa umwana neza no kumutegurira imfashabere iboneye igihe ageze ku kigero cyo kuyihabwa. Ababyeyi basabwe guhitamo ibiribwa bifite intungamubiri no gukoresha neza ibiribwa biboneka mu ngo zabo, aho bishoboka, kugira ngo abana babone indyo yuzuye.

Mu butumwa bwe, Umuyobozi w’Akarere wungirije Mbonyintwari JMV yasabye abaturage kugira uruhare rugaragara mu gukumira imirire mibi, ashimangira ko iki atari ikibazo cy’inzego z’ubuzima gusa, ahubwo ko ari inshingano ihuriweho n’umuryango, ubuyobozi n’abafatanyabikorwa.

Yagaragaje ko umwana ufite imirire myiza agira amahirwe menshi yo gukura neza, kwiga no kuzagira uruhare mu iterambere ry’umuryango n’igihugu. Yasabye ababyeyi kudategereza ko ikibazo cy’imirire mibi gikomera, ahubwo bakagira umuco wo kugikemura hakiri kare no gukurikirana ubuzima n’imikurire y’abana babo.

Umuyobozi kandi yasabye ababyeyi kurinda abana ibiribwa n’ibinyobwa bitujuje ubuziranenge, bishobora kubatera indwara cyangwa kubangamira imikurire yabo. Yashimangiye ko kurinda umwana ibyo ahabwa ari kimwe mu bigize inshingano z’ababyeyi mu kumurinda indwara no kumufasha gukura neza.

Isuku n’isukura byagarutsweho nk’ikindi kintu cy’ingenzi mu kurinda abana imirire mibi. Abaturage basabwe gukaraba intoki, gukoresha amazi meza, kubungabunga isuku y’ibiribwa no gutegurira abana amafunguro ahantu hasukuye.

Abateguye ubukangurambaga bagaragaje ko indwara ziterwa n’umwanda zishobora kugira ingaruka ku buzima bw’umwana no ku buryo umubiri we ukoresha intungamubiri, bityo ko isuku ikwiye kujyana n’ingamba zo guteza imbere imirire.

Mu rwego rwo gushyigikira ubutumwa bwatanzwe, abana bitabiriye igikorwa bahawe amata. Iki gikorwa cyagaragaje uruhare rw’abafatanyabikorwa mu gushyigikira ibikorwa bigamije guteza imbere imirire y’abana no gukangurira abaturage gufata ingamba zifatika.

Abaturage bashishikarijwe kandi gukoresha amahirwe bafite yo kubona ibiribwa bitandukanye, bakabihuza mu mafunguro y’abana kugira ngo babone indyo irimo intungamubiri zitandukanye kandi zihagije.

Ubuyobozi bwibukije abaturage ko gukumira imirire mibi ari igikorwa cy’igihe kirekire gisaba ubufatanye no guhozaho. Ababyeyi basabwe gukurikirana uko abana babo bakura, kwitabira ibikorwa byo gupima imirire no kugana inzego z’ubuzima igihe babonye ibimenyetso bishobora kugaragaza ikibazo.

Uruhare rwa Urunana DC, Rwanda Children, World Vision Rwanda n’abandi bafatanyabikorwa rwagaragajwe nk’ingenzi mu gufasha inzego z’ibanze kugeza ubutumwa ku baturage no gushyigikira gahunda zigamije guteza imbere ubuzima n’imibereho myiza y’abana.

Ubu bukangurambaga bwagaragaje ko kurwanya imirire mibi bidakwiye gufatwa nk’igikorwa cy’inzego runaka gusa, ahubwo ko ari inshingano y’umuryango wose. Konsa neza, guha umwana indyo yuzuye, kumurinda ibiribwa bitujuje ubuziranenge no kumurera ahantu hasukuye ni ishoramari ku buzima bwe no ku hazaza h’umuryango.