Kuri uyu wa gatatu tariki ya 10 Kamena, 2020 mu cyumba cy’inama cya FIAT iherereye mu murenge wa Byumba, Umyobozi w’Akarere Wungirije Ushinzwe Imibereho Myiza y’Abaturage Madame MUJAWAMARIYA Elisabeth yayoboye inama nyunguranabitekerezo yari igamije kurebera hamwe ibikubiye mu mushinga wa ORGANISATION OF TRAUMA CONSELORS (ARCT-RUHUKA) ari wo Muryango Nyarwanda w’Abajyanama b’Ihungabana” ku nkunga y’Umuryango Mpuzamahanga wo mu gihugu cy’Ubudage wita ku burenganzira bw’abana b’abakirisitu/o KINDERNOTHILFE (KNH).

Madame ABATONI Jane, Umunyamabanga Nshingwabikorwa wa ARCT-RUHUKA asobanura iby'uyu mushinga

Uyu mushinga witwa “Frienly Environment for Children Project” ugomba kuzamara imyaka ine, ufite intego igira iti: “Umuryango nyarwanda ubereye umwana” mu ntero igira iti: “Twubake Umuryango Nyarwanda uzira ihohoterwa rikorerwa abana, tubafashe kuzamura impano bifitemo, bagira uruhare mu bibakorerwa, bishimire ubwana bwabo”aho bigaragara ko uzita ku kurengera uburenganzira bw’umwana.

Uyu mushinga ku ikubitiro ugiye gutangirira mu mirenge ya RUBAYA, RUKOMO, MANYAGIRO na BYUMBA ukaba waratekerejwe bivuye mu bitekerezo byavuye mu matsinda (Clubs) y’abana bakomoka mu miryango yarangwagamo amakimbirane ARCT-RUHUKA yakoranye nayo mu rwego rwo kuyasohokamo, aho basanze ko abana bakomoka muri iyi miryango bahura n’ihohoterwa rikomeye kuko kuva bakibatwita, batajya bagira ubitaho kugeza bavutse bagakura.

Iyi nama yari yitabiriwe n'abakozi b'Akarere n'Imirenge 4 n'abo mu Muryango ARCT-RUHUKA bazakurikirana uyu mushinga umunsi ku munsi

Ikindi uyu mushinga wagendeyeho ni icyegeranyo cyakozwe na Minisiteri y’Ubuzima ku Ihohoterwa Rikorerwa Abana n’Urubyiruko mu mwaka wa 2015 (VACYS 2015-16) cyashyizwe ahagaragara mu mwaka wa 2017 aho cyagaragaje ko 37.2% by’abakobwa na 59.5% by’abahungu barahuye n’ihohoterwa rishingiye ku mubiri (physical violence); 23.9% by’abakobwa na 9.6% by’abahungu barahuye n’ihohoterwa rishingiye ku gitsina (sexual violence); 11.8% by’abakobwa na 17.3% by’abahungu barahuye n’ihohoterwa ry’iyicarubozo (emotional violence).

Icyegeranyo kandi kigaragaza ko abana n’urubyiruko mu Rwanda bugarijwe n’ihohoterwa ry’iyicarubozo n’iryo ku mubiri kandi bigakorwa n’abantu bakagombye ahubwo kuribarinda, barimo ababyeyi, abaturanyi, abarimu, incuti z’abakobwa n’abahungu. Icyegeranyo cyagaragaje ko 48% by’inda zagaragaye zitifuzwaga zaraturutse ku ihohoterwa rishingiye ku gitsina.

Umunyamabanga Nshingwabikorwa wa ARCT-RUHUKA Madame ABATONI Jane yavuze ko biteguye gufatanya n’Akarere kandi ko bazakora ibyo Akarere gashaka ko bafatanyamo, batazanywe no kuvuga ngo gahunda yabo ni iyi, ngo akaba ari yo mpamvu mbere yo gutangira babanje kuwubagezaho ngo barebe niba hari ibyanozwamo mu rwego rwo kugira ngo uzasige umusaruro ufatika mu miryango yo mu mirenge bazakoreramo, Akarere ndetse n’igihugu muri rusange.

Umuyobozi w’Akarere Wungirije Ushinzwe Imibereho Myiza y’Abaturage Madame MUJAWAMARIYA Elisabeth yashimiye ARCT RUHUKA kuri uyu mushinga uje kunganira izind gahunda Akarere kagezaga ku baturage. Yagize ati: “Muje muri igisubizo kuko mugiye kujya mufata igihe gihagije cyo kumva ibibazo by’abaturage mu rwego rwo kubafasha mu bujyanama ngo babisohokemo, kandi nkaba mbashimira n’uburyo mwemera kugendera ku byifuzo by’ubuyobozi ntimutsimbarare ku mushinga muzanye.” Yashoje abizeza ubufatanye bw’iyi mirenge bazakoreramo ndetse n’ubw’Akarere by’umwihariko.