Mu rwego rwo kunoza imikoreshereze y’ubutaka no guteza imbere imiturire igezweho, Akarere ka Gicumbi ku bufatanye n’abandi bafatanyabikorwa kashyize ahagaragara inyigo y’igishushanyo mbonera (Detailed Physical Plan) igamije gutunganya site ya Nyagatoma na Nyansenge. Iyi site iherereye mu Murenge wa Rutare, Akagari ka Nkoto, ku birometero 30 uvuye mu mujyi wa Kigali.

Iyi site ifite ubuso bungana na hegitari 30 (30Ha), ikaba ibarizwa mu midugudu ya Nyagatoma na Nyansenge. Ikaba iri ku ntera iri hagati ya metero 300 na 500 uvuye ku muhanda wa kaburimbo Kigali–Gatuna ahazwi nka Cyamutara, ndetse ikaba ikora no ku muhanda mugari wa Cyamutara–Rwesero.

Ibyiciro byose byo gutunganya iyo site byarangiye neza, harimo no gushyiramo imihanda hakoreshejwe uburyo bwa “approche communautaire”, aho abaturage bagize uruhare mu ishyirwa mu bikorwa ry’iyo gahunda. Ubu hateguwe neza ibibanza 526, birimo 196 byamaze kubakwaho n’ibindi 330 bitarubakwa.

Igisushanyombonezamiturire (detailed physical plan) cya NYAGATOMA 

Umuyobozi w’Akarere ka Gicumbi, Bwana NZABONIMPA Emmanuel agaragaza ko isozwa ry’iyo site ari intambwe ikomeye mu guteza imbere imiturire inoze mu karere, agira ati: “Iyi site yatunganyijwe mu buryo bugezweho, kandi turateganya gukomeza gukorana n’abaturage n’abashoramari kugira ngo hongerwe ibikorwa by’iterambere bizana impinduka nziza ku buzima bw’abahatuye.”

Igisushanyombonezamiturire (detailed physical plan) cya NYANSENGE