Kuri uyu wa 07/03/2025 Umuyobozi w'Akarere Wungirije Ushinzwe Iterambere ry'Ubukungu Madamu UWERA Parfaite ari kumwe n'Abagize itsinda ry'abagize Bridge to Prosperity (B2P) bayobowe na Madamu TINA Kanyana, batashye ku mugarararo ikiraro cyo mu kirere cya Busabira gihuza imirenge ya Buyoga yo mu Karere ka Rulindo n’Umurenge wa Mutete wo mu Karere ka Gicumbi bikaba byari ibirori.

Iki kiraro cyuzuye gitwaye amafaranga y’u Rwanda miliyoni Magana abiri n’eshanu, ibihumbi Magana atandatu na mirongo cyenda na bitatu Magana abiri na mirongo ine n’atatu (frw 205,693,243) harimo 38% y'uruhare rw'Akarere ka Gicumbi cyahaye akazi abaturage barenga 300 nk’uko ubwabo babyivugiye.

Bimwe mu bibazo abaturage bahuraga nabyo kije gukemura, harimo icy’ubuhahirane butari bugikorwa neza n'imigenderanire ku bikorwa by'iterambere bihari birimo amashuri ya GS Muyanza yo mu Murenge wa BUYOGA mu Karere ka Rulindo, GS Mutandi, Umurenge, Ikigo Nderabuzima cya Musenyi, isoko rya Kavumu, Ishuri Ribanza rya (EP) Shagasha n’Ishuri Ribanza rya (EP) Nyabisiga byose byo mu Murenge wa MUTETE, Akarere ka Gicumbi. Ikindi kibazo cyije gukemura ni icy'umugezi wa Rugabano wuzura mu gihe cy’imvura nyinshi kigahagarika ubuhahirane harimo n'aho bamwe batabashaga gutaha biganjemo abana bato.

Mu butumwa bwatanze n’Umuyobozi w’Akarere Wungirije Ushinzwe Iterambere ry’Ubukungu, yashimiye mbere na mbere Leta yacu ku isonga Nyakubahwa Perezida wa Repubulika Paul KAGAME kubera ibikorwa by’iterambere n’imibereho myiza byabo ikomeje kubegereza. Yanashimiye kandi Umufatanyabikorwa Bridge to Prosperity ku bikorwa byo kubaka ibiraro byo mu kirere bifasha abaturage bo mu Karere ka Gicumbi mu koroshya ubuhahirane no gukemura ingaruka n'impanuka zatwaraga ubuzima by'umwihariko ku bana bato byajyaga bigaragara cyane mu gihe cy'imvura mu myaka ishize bajya ku ishuri, ubu bakaba bajya ku ishuri bakanataha mu mutekano usesesuye.

Yashoje asaba abaturage muri rusange gukomeza kubungabunga ibikorwa by'iterambere n'imibereho myiza yabo begerejwe ndetse n'ibindi bakomeje kwegerezwa, kugira uruhare muri ibyo bikorwa no guhanga udushya tugamije kubakura aho bari bagana imbere bagamije kwigira bakajya bishakamo ibisubizo.