Ibi ni bimwe mu byagarutsweho na Minisitiri w’Ubutegetsi bw’Igihugu Prof. Shyaka Anastase kuri uyu wa kabiri tariki ya 25 Gashyantare 2020 kuva ku isaha ya saa cyenda z’umugoroba mu nteko y’Abaturage yo mu Kagari ka Bisika ko mu Murenge wa Rukomo.

Minisitiri w’Ubutegetsi bw’Igihugu, Prof. Shyaka Anastase abwira abaturage ko azanywe no kubumva

Muri iyi nteko y’abaturage yari yiganjemo abaturage bo mu Kagari ka Cyeya ndetse n’abandi bake bari baturutse mu tundi tugari twegereye aka ka Cyeya, Minisitiri w’Ubutegetsi bw’Igihugu Prof. Shyaka Anastase yakiriwe n’Umuyobozi w’Akarere ka Gicumbi bwana Ndayambaje Felix wari hamwe n’Inzego z’Umutekano ni ukuvuga Polisi n’Ingabo.

Abaturage bishimiye ko Minisitiri w'Ubutegetsi bw'Igihugu yabahaye umwanya wo kumugezaho ibyifuzo n'ibibazo bitakemukiye mu nzego z'ibanze

Ahawe umwanya, Minsitiri Shyaka yabwiye abitabiriye iyi nteko ko ashaka kubumva no kumva ibibazo bafite mu rwego rwo kubikemura. Bimwe mu bibazo byagaragajwe harimo ibyarebaga inyungu rusange ari byo amazi n’amashanyarazi ndetse n’ibindi byihariye bishingiye ku makimbirane mu ngo no mu miryango bitakemukiye mu nzego z’ibanze cyangwa byahawe umurongo n’izi nzego ndetse n’inkiko ariko ba nyirabyo bagatsimbarara ntibabyemere.

Prof. Shyaka Anastase afatanya n'abitabiriye inteko gutanga umurongo ku bibazo bamugejejeho

Nyuma yo kwakira ibibazo by’aba baturage yafatanije n’abitabiriye iyi nteko  gutanga umurongo, Minisitiri w’Ubutegetsi bw’Igihugu Prof.Shyaka Anastase yabwiye ko bafite ibibazo bitatu gusa.

Yagize, ati: “Munyemerere mbamenyeshe ko mufite ibibazo bitatu ari byo: Icya mbere ni amakimbirane menshi mu miryango, icya kabiri ni abantu bigize indakoreka haba ku ruhande rw’abaturage haba no ku ruhande rwa bamwe mu bayobozi naho icya gatatu ni abantu bakunda imanza”.

Ku ngingo ya mbere ijyanye n’amakimbirane, yababwiye ko aya matiku menshi usanga aterwa n’inzoga z’inkorano n’ibindi biyobyabwenge, ubunebwe, gukubita abagore no guharika.

Yagize, ati: Ntabwo turibwemere abagabo bakubita abagore, ni ukwigisha kuko kirazira nta mugabo uhanisha umugore inkoni, kirazira muri uru Rwanda rw’uyu munsi guhanisha umugore inkoni. Ikindi, ikintu cyo guharika no kwihanira mugishyire ku ruhande guharika byagiye kera kandi ni icyaha gihanwa n'amategeko”

Ku ngingo ya kabiri ijyanye n'abantu bigira intakoreka, Minisitiri Prof.Shyaka Anastase yavuze ko abo bantu bari mu ngeri zose ni ukuvuga mu bayobozi no mu baturage aho barenga ku mategeko nkana bakigarurira imitungo ya Leta.

Yagize ati: “Ibyo ntabwo bishoboka mu Rwanda twifuza, tugiye gusaba inzego zose z'ubuyobozi zigikemure, abigabije umutungo wa Leta birangirane n'uyu munsi kandi twubahe ubuyobozi kuva ku mudugudu kugera kuri Nyakubahwa Perezida wa Repubulika.Turashaka ko abaturage bubahiriza amategeko, tukubaha ubuyobozi bwose, tukihesha agaciro, tugaharanira kugira igihugu cyiza, kandi tugakomeza kwimakaza isuku n’umutekano”

Mu bibazo byakiriwe na Minisitiri w'Ubutegetsi bw'Igihugu harimo n'ibyarangijwe n'inkiko

Ku ngingo ya gatatu irebana n’abantu bakunda imanza, Minisitiri w’Ubutegetsi bw’Igihugu yasabye abaturage kwirinda umuco wo kuburana urwa ndanze kuko guhora mu manza bibadindiza mu iterambere kuko bituma batabona umwanya wo gukorera ingo zabo ngo biteze imbere.

Yagize ati: “Muri abantu bakunda imanza kandi ugasanga muburana amahugu bityo mukaba mudashobora gutera imbere kuko mumara igihe kinini mupanga uko muzaburana. Mugomba gufasha hasi, mukarekura n'iyo mwaba muburana amafaranga abiri ntimwitwaze ko muzi kuburana cyane. Mushyire imbaraga mu gukora”.

Mu gusoza iyi nteko y’abaturage yo muri aka kagari ka Cyeya, abaturage bahigiye Minisitiri w’Ubutegetsi bw’Igihugu Prof.Shyaka Anastase, gukemura ibi bibazo bikidindiza iterambere ryabo bitarenze amezi atanu  nawe abasezeranya kubakorera ubuvugizi ku kibazo cy’amazi n’amashanyarazi bamugejejeho anabasaba ko abafite amafaranga baba baguze imirasire y’izuba hagati aho bakaba bayifashishije.

Prof. Shyaka Anastase, Minisitiri w'Ubutegetsi bw'Igihugu ashimira abitabiriye inteko anabizeza kuzagaruka kwirebera impinduka